Ford competirá este ano na famosa e arriscada subida de montaña americana Pike's Peak a través do equipo de rallycross Olsberg Motor Sport Evolution, que porá dúas unidades do novo Festa co que compite no europeo de Rallycross. Os Festa de motor central e tracción total estarán pilotados polo dobre campión de mundo Marcus Gronholm e o experimentado piloto de rallycross Andreas Eriksson. O Ford Festa de rallycross é unha salvaxe máquina de 800 CV, potencia que se consegue a base de sobrealimentar ata o extremo o motor de 2.0 litros Duratec de Ford. O motor está colocado en posición central traseira tras o asento do piloto e envía a potencia ás catro rodas. A suspensión Öhlins será desenvolvida especificamente para esta proba polo equipo Olsberg e a filial deportiva de Ford en Europa Team RS.Ford segue o camiño que tomaron no seu día Audi e Peugeot durante os anos oitenta cando participaron na temible Pike's Peak con coches de rallye de Grupo B preparados especificamente para a subida americana. Tanto Marcus Gronholm, que ten no seu haber 30 vitorias no Mundial de Rallyes, como Andreas Eriksson, catro veces campión sueco de rallycross, terán que facer fronte ao cambio de altitude mentres soben aos 4.300 m onde se atopa a meta, tras 20 quilómetros de subida e 156 curvas. O Pike's Peak ten unha primeira parte de asfalto, para logo converterse en pista de terra moi lisa e rápida, cunhas grandes caídas e barrancos aos lados que non permite erros. A subida Pike´s Peak, situada no Estado de Colorado celébrase desde 1916 e é unhas das competicións máis antigas de Norteamérica. Participantes desde motos de 250 cm3 ata camións de carreira de 3.500 kg. Este ano terá lugar o 19 de xullo.
0 comentarios:
Publicar un comentario