Despois de ceder moito tempo nunha picada, os graves problemas de freos obrigan ao equipo a abandonar a falta do último tramo.Con moita ilusión chegaba Alberto Meira e todo o seu equipo ao Rali de Ourense, a segunda das citas do miniprograma que o piloto de Vincios está a realizar no Campionato de España cos neumáticos Pirelli. Alberto comentaba de feito antes do rali que "Montamos unha caixa de cambios, freos e diferenciais novos no coche, para afrontar con garantías un rali tan longo como este."
No entanto, durante o primeiro tramo un problema cos pedais (unha peza do soporte do acelerador torceuse e ás veces quedaba trabada baixo o pedal de freo) impedía a Meira concentrarse do todo no inicio. Unha vez emendada esa deficiencia, Meira-Bañobre comezaba a recuperar terreo e manter unha dura pugna cos principais rivais da súa categoría: Enrique García Ojeda (16 segundos por diante) e Pedro Burgo (a só 3).
O copiloto, Álvaro Bañobre, comentaba ao mediodía que: "Tal e como está o rali, con esta calor e tipo de tramos, os Súper 2000 son inalcanzables. O noso obxectivo vai estar en loitar por ser o mellor dos coches da categoría N plus. Tivemos algúns problemas de freos, e imos cambiar os discos."
Unha picada no tramo do "Canón do Sil" custaríalle ceder dous minutos e toda opción a manterse na pelexa, aínda que a vantaxe acumulada anteriormente permitíalle manterse na sexta praza. A partir de aí o obxectivo sería ante todo terminar a carreira, obxectivo que non podería alcanzarse debido a que o coche quedou literalmente sen freos no penúltimo tramo. Na meta do mesmo, Alberto comentaba que "Levámonos un gran susto, cando o pedal de freo veuse abaixo. Os freos xa non aguantan máis, e non imos saír ao último tramo porque o risco que imos asumindo é inaceptable. Non quero saír a un tramo nestas condicións, porque se que imos ter un accidente e non só nos pomos en perigo os que imos no coche, senón tamén a xente que nos está animando."
0 comentarios:
Publicar un comentario