Durante este fin de semana tivo lugar en Santiago o Rali Botafumeiro, organizado pola Escuadra Compostela, e que supuña a última proba no Campionato Galego da especialidade. Un dos puntos de interese desta proba radicaba en que presenciariamos o desenlace da Copa Kumho, certame no que tres pilotos chegaban con opcións de proclamarse Campión: Paulo Gradaílle, Roberto Tenreiro e Édgar Vigo (dependendo xa este último moito máis do que fixesen os dous anteriores).
Pero á marxe desa pelexa polo campionato, en Santiago brillou con luz propia David García, que se fixo cunha merecidísima vitoria. Proba da súa rapidez é que logrou gañar nas dúas probas nas que conseguiu chegar á meta. De ser máis consistente, sen dúbida tamén el fose candidato ao título
García logrou a vitoria por diante de Tenreiro, que pelexou até a última sección por unha vitoria que mantivese as súas opcións ao campionato, pero que no penúltimo tramo sufría un problema eléctrico e cedía moito tempo. O seu feroz ataque no último tramo non lle servía máis que para lograr a segunda praza, insuficiente para arrebatar o título a un Gradaílle que durante toda a xornada correu "coa calculadora" e que se dedicou a asegurar a cuarta praza que lle brindaba o título.
0 comentarios:
Publicar un comentario