UN GRAN IVÁN ARES GAÑA O RALI DO COCIDO

Iván Ares adxudicouse onte a decimoséptima edición do Rali do Cocido que concluíu con polémica debido á neutralización do último tramo da carreira correspondente á segunda pasada por Brántega. Nela, a valvulina que desprendía o Skoda Octavia WRC de Roberto Blach foi a causante de que os pilotos seguintes en tomar a saída negásense a facelo, aínda que segundo fontes da organización foi o comisario do tramo quen decidiu neutralizalo pola vertedura do aceite sobre o asfalto. Tras a reunión de comisarios celebrada no Pontiñas Haley, estes decidiron darlle o tempo de Pedro Burgo, segundo clasificado da carreira, ao resto de participantes ao entender que o do propio Blach era anómalo. O veredicto dos comisarios prolongouse até pouco antes da medianoite ante o malestar dos numerosos afeccionados que agardaban nas inmediacións do parque pechado situado na gran superficie da cabeceira comarcal dezano.
Con todo, o primeiro rally do Galego de Asfalto de 2011 viviu unha segunda xornada moi entretida, que foi seguida por un numeroso público nas cunetas dos diferentes tramos. Ares fixo scratch na primeira pasada por Xirón seguido de Luís Penido e de Pedro Burgo, mentres José Miguel Martínez Barreiro, "Bamarti", conseguía terminar sétimo a pesar dos evidentes problemas mecánicos do seu Ford Escort WRC. Os malos presaxios para o piloto da Escuadra Estradense confirmáronse pouco antes de tomar a saída na primeira pasada polo Couto, onde a rotura do palier dianteiro fixo que o de Cuntis dixese adeus á proba dezano moi contrariado. Neste tramo, o Ford Focus WRC de Burgo foi máis rápido que Ares e Roberto Blach, que xa por entón se empolicaba á terceiro posición da clasificación provisional ao volante do seu Octavia.
Aciveiro volveu mostrar a un Iván Ares máis agresivo que os seus competidores, mentres Burgo terminaba sétimo debido aos fallos na suspensión da súa montura. Blach e Penido foron segundo e terceiro no tramo do cenobio forcaricense a máis de sete segundos do coruñés. Na segunda pasada por Xirón Burgo foi o encargado de facer scratch deixando a máis de seis segundos a Ares e a máis de 15 ao terceiro, Fernando Rico. O último tramo da mañá correspondente á segunda pasada polo Couto volveu ter a ser para Burgo seguido de Ares e Blach. De volta a Aciveiro, Ares retomou o mando da carreira cun novo scratch, sendo Penido segundo e Blach terceiro. Burgo volveu ter problemas terminando a sección en cuarta posición.
Saborida e Brántega foron dous tramos disputados a cara de can polos dous aspirantes á vitoria. Burgo impúxose na primeira pasada por Brántega e, tamén, na primeira de Saborida. Ares fixo scratch na segunda pasada por Saborida por diante de Burgo pouco antes do incidente do último tramo da carreira lalinense.

UN GRAN IVÁN ARES GAÑA O RALI DO COCIDO